1. ისტორიული ქალაქი გალავნით
სიღნაღი საინტერესოა ქიზიყური აივნიანი სახლებითა და ძველი ისტორიული ქუჩებით, აქ შეხვდებით მე-19, მე -20 საუკუნის საცხოვრებელ სახლებს რომელთა ნაწილს (უშუალოდ ქალაქ სიღნაღში 100 - მდე შენობა) მინიჭებული აქვს კულტურული მემკვიდრეობის ძეგლის სტატუსი. სიყვარულის ქალაქის სანახაობებიდან განსაკუთრებულ ყურადღებას იქცევს სიღნაღის გალავანი რომელიც ერთ-ერთი უდიდესი ისტორიული მნიშვნელობის ძეგლია არა მარტო კახეთში, არამედ მთელ საქართველოში. მას თითქმის 40 ჰექტარი ფართობი უჭირავს, კედლის სიგრძე კი 4 კმ-მდეა. სიღნაღის ციხესიმაგრის ისტორია დაკავშირებულია მეფე ერეკლე II - ის სახელთან, მეფემ მას მთავარი როლი დააკისრა ლეკების, ოსმალ- ყიზილბაშებისა და სხვა მტრებისაგან ქიზიყის დასაცავად. ისტორიულ გალავანზე მოწყობილია შესაბამისი ინფრასტრუქტურა, რაც დაინტერესებულ სტუმრებს შესაძლებლობას აძლევს ციხესიმაგრეზე გადაადგილდნენ ფეხით, დატკბნენ ალაზნის ველისა და კავკასიონის მთების ხედით. ციხის კოშკებიდან დღესაც შეგიძლია გადმოხედო ქალაქს, როგორც მნახველებმა საუკუნეების წინ.